Kontraloria General di Kòrsou tabata anfitrion durante e siman di 3 te ku 7 Yüli 2023 di e ‘SAI PMF Review Workshop’. E workshop aki a wòrdu organisá dor di ‘INTOSAI Development Initiative’ (IDI) den koperashon ku ‘Caribbean Organization of Supreme Audit Institutions’ (CAROSAI). Aparte di Kontraloria General di Kòrsou, a tuma parti na e workshop, Kontralorianan di Grenada, Montserrat i Saint Vincent and the Grenadines. E workshop tabata kontinuashon riba e kurso online di kuater siman ku a wòrdu duna den luna di novèmber i desèmber 2022 dor di IDI na un tim di tres funshonario di kada un di e Kontralorianan aki.
E kurso a trata e metodologia pa evaluá e prestashon di un Kontraloria pa medio di e ‘Supreme Audit Institutions Performance Measurement Framework’ (SAI PMF). E kurso tabata tin komo meta, pa ekipá e partisipantenan ku konosementu básiko i kapasidatnan ku ta nesesario pa por ehekutá un ‘SAI PMF assessment’. Konsekuentemente ta ferwagt ku e partisipantenan lo ta kapas pa por apliká e prinsipionan i metodologia di e ‘SAI PMF’ ora di plania i implementá un ‘assessment’ di e prestashon di un Kontraloria i reportá tokante di esaki. Despues, ku e konosementu i kapasidatnan atkerí, kada tim durante e promé mitar di aña 2023 a ehekutá un ‘SAI PMF self-assessment’ di nan Kontraloria.
Durante di e workshop e progreso di e trabounan hasí dor di e timnan a wòrdu evaluá. Ademas e workshop a sòru pa e timnan risibí e konosementu i kapasidatnan nesesario pa por hasi un análisis di e kousanan prinsipal di e nivel di prestashon di nan Kontraloria i pa yega na un evaluashon kualitativo di e prestashon. Mas aleu e workshop a duna e timnan e yudansa nesesario pa por finalisá e rapòrtnan. Despues di esaki, IDI lo sigui brinda yudansa riba distansia durante e fasenan restante di e proseso di ‘assessment’ na e timnan pa asina garantisá un finalisashon di balor haltu i na tempu di e rapòrtnan.
Konforme e planifikashon e rapòrtnan definitivo lo ta kla pa 31 di Òktober 2023.
