Historia di Kontraloria General di Kòrsou tin su rais den historia di Kontraloria General di Hulanda, ku ta bai bèk te na aña 1447. E aña ei, Filips de Goede, Duke di Borgoña, a funda un institushon bou di e nòmber di ‘Camere vander Rekeninghen’ ku lo mester a kontrolá si e gastu- i entradanan di su propiedatnan ta kuadra.
Den dékada sinkuenta di siglo 20, den kuadro di Statüt, diskushon a lanta enkuanto si tabata nesesario krea un funshon di Kontraloria pa Antia Hulandes. E konklushon ku a yega na dje e tempu ei ta ku e ambiente den kua un Kontraloria di Antia lo mester funshoná no a nifiká solamente ku lo tin ku adaptá e legislashon korespondiente; e ambiente ei lo determiná tambe kon outónomo un Kontraloria asina lo por ta. Ku otro palabra, mas chikitu un komunidat ta, mas peliger tin ku e influensianan negativo ku ta típiko di komunidat chikitu lo stroba e ‘outonomia’ ei. En bista entre otro di nos tamaño i ekspertisio limitá, tabatin duda enkuanto si Antia Hulandes por a kumpli ku e funshon ei riba nos mes.
Dia 29 di novèmber 1951, gobièrnu di Pais a entregá e promé proyekto di ordenansa nashonal na Parlamento pa instituí un Kontraloria di Antia Hulandes, pa un periodo di tres aña, konforme loke tabatin fihá den Landsregeling. Parlamento tabata di opinion ku no ta nesesario krea un organismo outónomo ‘nobo’ di Antia mes:
- Landsregeling a menshoná solamente e eksigensia di outonomia
- en bista di e tamaño limitá di nos komunidat, haña personal pa un organismo asina lo a bira un problema
- no mester a balotá e aspekto finansiero (gastu).
Parlamento a opiná ku mester a apelá na Kontraloria General hulandes. Gobièrnu, a base di prinsipio, a keda para riba nan punto.
Un organismo outónomo di Antia mes lo a sirbi pa komplementá e derecho di presupuesto otorgá kaba na Parlamento. No tabatin mag di lanta duda na Hulanda enkuanto Antia su kapasidat di goberná su mes independientemente den tur sentido.
Sinembargo, Parlamento a insistí riba nan posishon i, komo resultado, Gobièrnu a pidi Kontraloria General di Hulanda tuma e tareanan di Kontraloria Antiano na nan enkargo riba base temporal, pa un periodo (inisial) di tres aña. E periodo inisial di tres aña a keda prolongá ku tres aña mas i despues ku unu mas, te 1 di yanüari di 1960.
Dia 23 di mart 1956, Parlamento a aprobá un proyekto di lei modifiká pa instituí un organismo independiente di kontrol (ku lo a operá bou di Kontraloria hulandes) i despues, 30 di mei 1956, a promulgá un dekreto nashonal ku forsa retroaktivo te 1 di yanüari di 1953. Ku esaki Kontraloria a selebrá durante 2018 su di 65 aña di eksistensia.
