Fundashon ‘Tur ta konta’

Tres investigadó di Kontraloria a haña dispensashon di un parti di nan tareanan pa por duna un aporte na e proyekto ‘Tur Ta Konta’. E fundashon ku ta organisá e proyekto akí ta apuntá tutor pa yuda alumno ku tin mester di yudansa èkstra ku aritmétika i matemátika. Ta importante pa un alumno por konta bon; asina e tin mas chèns di logra bon resultado ku e materianan eksakto manera matemátika, físika i kímika den enseñansa sekundario.

Segun un di nos tutornan sierto alumno tin mester di e yudansa akí debí ku nan tin un retraso edukativo òf debí ku nan tin mester di atenshon èkstra. E ta mira ku e proyekto ta nesesario i ta benefisiá e alumnonan den nan estudionan den futuro.

Un otro tutor ta bisa ku e alumnonan ta sigui e lèsnan fielmente, yen di entusiasmo i energia, tantu despues di skol komo den fin di siman. Esei ta algu ku ta dun’é un sentido di satisfakshon i stimul’é pa sigui kontribuí ku e proyekto.

E di tres tutor tambe ta mashá positivo tokante e proyekto. E ta ripará ku e alumnonan ku e ta yuda ta bai hopi dilanti. E problema prinsipal ku e ta ripará serka su alumnonan ta ku tin palabra ku nan no konosé, pasobra sea nan no ta ser usá òf ta ser usá masha poko den e mucha su ambiente. E ta sinti ku ta su tarea pa familiarisá e muchanan ku e palabranan akí. Ora e alumnonan komprondé e palabranan mihó, nan por komprondé e materia ku nan ta haña den lès tambe mihó, loke na su turno ta duna nan mas smak di siña. Di e manera akí por redusí ‘drop-out’ na skol. Esei ta un di su motivashonnan pa sigui kontribuí ku e proyekto.